انتهت قصة الحب ب فراق كل واحد راح بطريقه وبعتم الليل نزلت دموع كتيرة ، بعدها تنهيدة و جرح لازم يتسكر لبداية جديدة
بس يا ترى ليش منبكي ؟!
الجواب ع هاد السؤال لازم نتعرف على الأنواع التلاتة للدموع :
دموع قاعدية : بيتم إفرازها من القنوات الدمعية بشكل مستمر ، فيها مضادات بكتريا كما أنها تساعد على إبقاء العين رطبة لتسهيل الرمش .
دموع الانعكاس : اللي بتنزل بسبب مهيجات متل البصل والدخنة .
والنوع العاطفي : اللي حكينا عنو بمقدمتنا ، بتكون ردا على عواطف مختلفة .
للأسف في نمطية سائدة بمجتمعنا إنه البكاء ضعف , أو إنتي قوية تغلبي ع كلشي ولا تبكي ، أو الرجال ما بيبكي
تعددت الأشكال والخاتمة واحدة كبت الدموع هالحالة اللي تعتبر مضرة للصحة النفسية لأن بامتناعك عن تلبية رغبة جسدك بالبكاء حرمت نفسك من كتير فوائد منها :
1️⃣ تهدئة الذات و تخفيف الألم ، إذ أن ذرف الدموع العاطفية يساعد على إطلاق الأوكسيتوسين و الإندروفين ، واللي بسببها منحس بالرضا و تخفيف الألم الجسدي والعاطفي والنفسي تماماً متل دموع ما بعد الانفصال اللي تعتبر شي طبيعي لنتعافى .
2️⃣ إضافة إلى تحسين المزاج .
3️⃣ قتل البكتريا و الحفاظ على نظافة العين ، لهيك بس أمهاتنا يقلولنا أي ابكوا ونضفوا عيونكم معن حق.
حتى إنه باليابان في نوادي للبكاء ، بتروح عليها لتبكي مع مجموعة أشخاص تانيين !! إيماناً منهم بأهمية البكاء وتنشيطه للجسم والذات بشكل صحي .
هون بيجي سؤالنا .. كم مرة بكيتوا لفترات طويلة و بس تخلصوا تحسوا حالكم مرتاحين كتير !
كم مرة انتهت جلسات البكاء مع الصحاب بضحكات عالية وأمل ؟
البكاء وقت الحاجة شي صحي ومانو عيب
وانشالله خاتمة دموعكم فرح ع طول
0 تعليقات
شاركونا بآرائكم وتعليقاتكم