إبني كان متخانق مع مراته ، هو مقالش حاجه بس انا فهمت

لما لقيته كل يوم والتاني يعدي عليه بعد الشغل يتغدي و يفضل قاعد و يروح علي النوم كذا يوم ورا بعض  


و في يوم كمل و نام و مرجعش بيته و من ساعتها قعد عندي 

و طبعاً أنا بلبي له كل طلباته من أكل و شرب و لبس ... و خدمه ٥ نجوم و مش ناقصه حاجه 

و نزل يقابل أصحابه و جابهم عندي البيت و عاش حياته كأنه اعزب و الوضع عجبه و مابقاش يرجع بيته خالص  


انا شايفه أبني مبسوط و بدأ حالته تتحسن و هو معايا 

و زي أي أم هتمني ايه غير اني اشوف ولادي مرتاحين 


بس من جوايا بقول 

طيب و مراته و بناته اللي سايبهم دول وضعهم أيه و لو فضل كدة قلبه هيقسي و هيتعود و أنا عارفه ابني كويس 


لما لقيته استحلي القاعده عندي 

اتحججت و قولت له لازم اروح اقعد عند خالتك عشان عيانه

زعل و اتعصب و قالي مش وقته أنا مش هينفع ارجع بيتي دلوقتي حرام عليكي يا ماما أنا جاي ارتاح شويه عندك  


-قولت له انت أرتاحت خلاص و اكتر من ٣ أيام كمان 

أنت كدة هتهجرهم يا أبني 

- راحتك في بيتك مش هنا 

-و انا لو ريحتك وأنا عارفه أن مراتك وبناتك تعبانين يبقي حرام عليه أنا كدة بأذيك 

-قوم ارجع لمراتك يا أبني مكانك هناك مش هنا 

-بيتي مفتوح لكم انت و مراتك و بناتك مع بعض في اي وقت


و دموعي نازله و قلبي بيتقطع عليه طبعا 😞


رجع بيته و خاصمني يومين و بعدها أتصل بيه عادي و بيضحك و صوته بيقول انهم اتصالحوا الحمدلله و مراته كلمتني عزمتني علي الغدا يوم الجمعه و كنت طايره من الفرحه ❤️ 


*أم حكيمه و من الحموات القلائل اللي بتعرف أمتي تشد و أمتي ترخي عشان ما تخربش حياه ولادها  


*جت علي نفسها وعرفت تقود مشاعرها و عرفت تاخد قرار حاسم و حازم خاصه إنها عارفه طبيعه أبنها 

و إنها شافت إنه بدا يرتاح عندها و خافت يتعود و الفجوة بينه وبين مراته تزيد